大市氣氛認真麻麻，外圍有乜風吹草動，港股跟跌唔跟升，昨日大市下跌230點，收20778。唔少公佈業績股份「見光死」，其中利豐（494）派成績表前走勢好硬淨，但到業績一出街，股價即裂口大跌10%，低收37.30元，圖表走勢已經破壞晒，股價大成交急跌，高追者呢鋪相信有排坐。
對付呢種市況，採取打游擊戰術可能比較適合，當見股份異動，即揮軍進攻，若然股價表現唔得，就定一個撤退策略，然後嚴守。半導體股昨日表現亮麗，事實上，多種電子產品近年需求急增，晶片股接單情況理想；其中晶門科技（2878）不動則已，一升即突破50日線及100日線，大升9.7%，高收0.79元，成交急增至4313萬股，相信升勢未完，下一站將挑戰3個月高位0.92元。
品質國際（243）同樣作勢突破，股價升7%，收報0.53元，其聯營樂依文已自願清盤，市場似乎憧憬品質會有新搞作，從近期股價表現睇，看來還有後着，不妨留意。
方星俠