一班大學生組成嘅「大專2012」團隊，為咗成功啟動公投，決定派人參加補選，同時發起「一人五十蚊撻着公投，撐行二零一二雙普選」網上募捐行動，希望籌到每區一個候選人5萬蚊選舉按金共25萬元。雖然籌款開始僅幾日，不過成績已經唔錯，成員黃永志透露，截至噚晚已經有近5萬蚊到位，數目令人鼓舞。
出示捐款入數紙
除咗呢5萬蚊，有個網民貓姐十分豪爽，表示噚日中午存入一張5萬蚊支票畀「大專2012」，支持佢哋參與公投，佢將入數紙放上網以示有憑據，唔係吹水。唔少網民對貓姐咁慷慨好激動，估唔到有人如此豪氣，一個人就包起五分一籌款目標。貓姐十分謙虛，話只係小小心意，「真係唔好誇讚我，我係可以做到嘢幫忙的就做，如此而已。」
黃永志則稱，由於呢筆錢以支票存入，噚日未喺戶口結餘見到已過數，可能今日先能夠確定收到呢筆大額捐款，不過佢話就算唔計呢筆錢，初步睇籌款反應理想，有近5萬蚊入咗戶口，相信款項會陸續有來。捐幾萬蚊咁大手筆唔係人人做得到，黃永志話雖然佢哋呼籲每人捐50蚊，不過好多人都超額，捐幾百蚊者眾，入數幾千蚊都有，總之集腋成裘，多多益善，少少無拘。
秘書長周澄卸任
有「水源」解決經費問題，「大專2012」出選無後顧之憂，好有可能參選嘅學聯秘書長周澄噚日同八方講，今個月底就卸任秘書長一職，屆時應該會較輕鬆，有多啲時間搞公投。周澄係愛國學校培僑舊生，加入支聯會兼且係青年組創組成員，在支聯會內暱稱「澄澄」，據稱有唔少fans，佢為咗公投出選嘅話，吸票唔成問題。
周澄唔做學聯秘書長，係因為學聯一年一度換莊，新副主席係中大范長豐，秘書長係葉楚茵，副秘書長林朝暉。葉楚茵舊年代表學聯參選支聯會第20屆常委，成為最年輕常務委員，參與常務秘書處同教育及推廣部工作。
mailto:[email protected]