以前英國皇室每逢有成員大壽，總會大赦天下又或者與民同樂。積架汽車身為英國品牌，當然都Keep住呢個與眾同樂嘅傳統，剛慶祝建廠七十五周年，梗係要有嘢益大家。香港代理就為積架旗下XF車系追加咗3.0Luxury升級版，免費大送價值10萬元升級設備益車主。
記者：趙慧敏
攝影：王文忠
Model：Keko
JaguarXF3.0Luxury屬XF車系中嘅入門型號，與SE版同係配備3.0V6引擎，釋出231匹馬力，0-100km/hr需8.3秒，不過兩者售價大拿拿相差成10萬銀，設備當然有別，不過經過代理今次賣大包後，令升級咗嘅XF3.0Luxury質素及設備都拍得住SE版。話明係升級，個樣睇得到自然係大前提，首先頭燈組增配Bi-Xenon白光燈，夜晚開起嚟更醒神。至於車廂，當然係保持一貫豪華質素，皮料軚環旁邊係一套免匙系統，以後着車連擰鎖匙嘅動作都可以慳番。而車尾新加倒車鏡頭，以後泊車喺邊度都更加得心應手。作為豪房，座椅質素梗重要，皮料柔軟順滑，英國手工藝果然不同凡響，難得今次前座都用上10×10段調控座椅，不同角度都可細緻調控，高矮肥瘦都坐得舒舒服服，加埋電動尾簾，唔怕俾太陽曬親。不過個人覺得最實際，反而係個天窗，雖然唔係太大，但房車有埋佢，咁至顯得夠豪。
RPerformance升跑味
免費升級當然好，不過車主仲可以用10萬蚊，加裝RPerformance配件，即時將房車變身跑車。10萬蚊買配套話多唔多，但單睇有型過人嘅前泵把氣壩配埋個電鍍網罩，兩側網罩上更有醒目LED燈眉，已經值回票價。配襯起附有積架標誌嘅電鍍鬼面罩，成個車頭更顯貴氣。車身加上兩邊裙腳，明顯再為車頭跑格推波助瀾。至於車尾，只加短小定風翼雖然顯得有點內斂，但小小定風翼就令整個車身顯得微微翹起，行車時猶如馬路中嘅飛豹。RPerformance呢套配件都算照顧周到，尾喉都係着眼點，喉嘴換成電鍍之餘，更加上跑車化嘅雙出式尾喉裝飾，貫徹整體跑格設計。積架一向以豪華見稱，皮料、桃木佈滿內櫳不同位置，但絕唔係得個睇字。積架嘅新設計不時為車壇帶來驚喜，就如XF車系中所採用嘅旋轉波檔按鈕已是一絕，加上啟動引擎後，旋轉按鈕會自動升起，很有未來車款嘅感覺。最細心係空調設計都別出心裁，啟動冷氣後，風口位才自動翻開，連細節位都滲出濃濃嘅豪房味。
規格
引擎：2,967ccV6
馬力：238bhp/6,800rpm
扭力：293Nm/4,100rpm
傳動：6前速自動波後驅
價錢：$598,000
查詢：積架汽車（25200989）