去年底離開政府嘅前民政事務局副秘書長蘇錦成，噚日正式獲申訴專員公署委任為新副申訴專員，下月1日返工，現任副專員余黎青萍4月19日任滿離任。
蘇錦成喺曾蔭權做財政司司長時，係煲呔政務助理，被視為煲呔愛將，佢離開AO行列，有人話係反映有能力政務官不滿政治問責制嘅跳船舉動，事關副申訴專員月薪約17萬元，無長俸及公務員福利，唔係多過佢做官時月薪14萬元好多。不過蘇錦成現年45歲，正所謂來日方長，話唔定第日有機會返轉頭再上層樓。
申訴專員黎年讚揚余黎青萍竭力處理市民因公營機構行政失當而引起嘅投訴，提高公共行政質素方面均卓有成效。