五區補選，曾蔭權講明不會去投票，由他帶頭表態，向西環交心的高級公僕，為了政治前/錢途，肯定數不在少。五一六不去投票，曾蔭權大把理由，幫佢數吓：
一、忙於擦鞋。對鞋擦極唔令，情緒低落，無法分身去投票。
二、怕了沙塵暴。對鞋之所以擦極唔靚，可能又係沙塵暴作怪。由北京吹落來的沙塵暴，一夜之間，香港連維港對岸也看不清，普選前景，當然也在塵暴中，唔知乜頭乜路。這一票，等於投進黃沙。五位議員，最沙塵那個毓民，活該灰頭土臉。
三、周日是睇樓好日子，自問關心年青人置業的特首，自然要緊貼市況，易容變臉跟大隊去睇樓格價，做個比師奶更精明的禮賓府阿叔。
四、突然安排自己和幾條地產第二代大水喉，飛去雲南視察旱情，有上海世博唔去，趕去西南方放水，凸顯非凡忠誠，等住俾溫總讚乖仔。
五、公投no，強拍yes，官字兩把口，特首有三把，吹得脹麼。
六、起鑊容易起義難，得閒寧願去捧《歲月神偷》場，將自己的負能量偷偷叉番正佢。
七、普選，假的真不了，公投是曾特首眼中的「志雲飯局」，收檔啦。