兩日升市，3支陰燭，即係話呢3個交易日內，早上買入下午坐艇，下午坐艇第二朝唔走人，又要再坐一會等機會。平時叫大家唔好見到即市大陽燭就咁開心，因為「陰的陽不了，陽的陰不了」。大市陰陽怪氣，唔好睇小呢3支陰燭嘅小型升市，恒指自金融海嘯谷底反彈以嚟都冇出現過，反映反彈力度不足之餘，市場成交小，大戶舞高弄低話都冇咁易。
航空股一飛冲天後，中國國航（753）只需兩日就將升幅全數消化，懶理大行將目標價調到天咁高。藥業股爆完聯邦制藥（3933），再爆出東北虎藥業（8197），反而國藥控股（1099）以近12億元收購母公司資產，好消息冇乜人理，只怪佢大大隻難於操控，有耐性不妨再坐一會。
中國遠洋扭虧可期
大市成交細，卻少人提及資金流向。港滙無異動，即係話資金冇大舉流出，但點解買賣兩閒，而美股卻節節向上，甚至升穿年半高位？因為美元回復強勢，噚日又再升到去年6月以來高位，資金從歐元英鎊等出逃，最大件事係連埋日圓一齊彈，「日圓先生」估日圓要升至85水平。常言道「美金彈，股市冇運行」，當美元同日圓一齊升，沽壓就更加大。
美滙升美股又升，令人百思不得其解，但諗深一層，資金都係搵個避風港，家市場擔心美國政府破產多過公司，因為公司債息已較國庫債券低，VIX指數只量度波幅，反映唔到市場的恐慌情緒，根本骨子裏人人自危，個個短炒。
美金升，資源跌，油價起碼唔會大漲，對航運股係一大利好。此外，經濟復蘇嘅最後梯隊剛發力，業績冇驚喜嘅東方海外（316）都有大行力撐，不妨留意吓有機會被大行調升評級嘅中國遠洋（1919）。月初瑞銀就其A股發報告，踩到一文不值叫沽，目標價5元人民幣，係當時正股38%。
分析員可能冇留意，中國海關公佈1至2月數字，中國鐵礦石進口按年增21%、煤炭增兩倍，而鐵礦石貿易量係全球嘅七成，亦係咁令中國可能喺3月出現貿易逆差，中國遠洋扭虧可期。
胡孟青