黃秋生前晚於會展出席「寰亞電影2010電影巡禮」，他將會拍攝杜琪峰監製、羅永昌執導的新戲《報應》。秋生透露近日發胖逾180磅，故要趕快減肥20磅，他又謂之前拍內地劇《楊貴妃秘史》飾演唐玄宗受盡折磨，並怒罵道：「每次老細一嚟片場，導演（龍小剛）就變咗副導演，着成幾十磅盔甲已經好熱，點知導演講一套，老細又講一套，左點右點，我除咗衫走返房谷鬼氣囉。」
秋生又謂片場又熱又多蒼蠅，有韓星更疑患上豬流感，秋生說：「有個茄喱啡係咁咳，我問佢係咪病，佢擰過嚟個鼻有啲綠色嘢流出嚟，好恐怖，我病都休息一日，其他演員病係唔畀休息。」他又透露同劇的謝君豪拍一場落雪戲，劇組竟用易燃發泡膠來燒，結果燒傷謝君豪的面頰。
採訪：張俊銘
攝影：黃偉雄