賴斯教授離開美國國務院後，返回史丹福大學，在胡佛研究所擔任ThomasandBarbaraStephenson公共政策資深研究學人，佢在丹佛大學取得博士學位，一九八一年加入史丹福做政治學教授，一九九三到九九年擔任首席副校長，佢讀書及教書時之主要研究興趣就係蘇聯。在三月十九日演講會答問環節，佢話自己小時候最喜歡彈琴，夢想做演奏家，但有一次參加一個音樂演奏會，親身見到一啲十一、二歲嘅兒童彈奏貝多芬，比佢自己更熟練，技巧更高，自嘆不如，立即轉改讀政治學，遇到前國務卿奧爾布賴特嘅爸爸JosefKorbel教授，改變了一生。呢位教授認真神奇巴閉，美國歷史上頭兩位女性國務卿分別係佢嘅女兒（第一位白人女國務卿）與學生（第一位黑人女性國務卿），而且一位係民主黨，一位係共和黨，一位自由派，一位保守派，可見有料大教授培養人才，確係不同凡響。
賴斯之亞洲安保構思，當然以美國為核心，例如佢講到亞洲之集體安全體系缺乏多邊架構，將來亞洲國家要透過多邊協商，展開一個建立架構之過程（institutionsbuilding），於是有客發問：「中國是亞洲大國，亞洲建立建構，假如由中國主動領導的話，美國是否視中國為威脅？還是視中國為環球安保體系之一個負責任持份者？」賴斯避過主題，如此回答：「美國是太平洋國家，歡迎中國主動，但最好與美國一起，亦同時邀請日本、南韓加入！」換言之，假如中國單獨與其他亞洲國家建立一個體系，美國會懷疑中國動機。用廣東話講就係：歡迎你哋自己行動，但最好要事先預埋我！
樣樣要預埋美國，正是問題所在，《華爾街日報》（三月二十二日）有一篇報導（NationsDeclinetoMarchtoU.S.Beat）指出，土耳其、巴西與中國在過去一個月，分別唔理會美國之建議，對制裁伊朗之事，當作耳邊風，而以色列就公然開罪副總統拜登，俄羅斯總理普京為伊朗提供援助，法國與英國對奧巴馬總統有所不滿……。似乎其他國家逐漸唔想樣樣預埋「大哥」一份咯喎，美國如何解困，要看第三位女國務卿希拉莉外交手腕如何。