前政務司司長陳太同孖生細妹方寧生，連同鄧蓮如女男爵上月底一齊慶祝70大壽，喺灣仔君悅擺12圍，當晚到賀賓客星光熠熠，陳太噚日話十分感謝朋友賞面，仲透露當晚有個驚喜。
鍾士元晒記憶力
陳太話酒店方面預先講明，會有個surprise畀三個女壽星，果然冇令大家失望，原來酒店特製三個手袋蛋糕送畀佢哋。三個蛋糕分別以Dior、Herm`es同BottegaVeneta造型，陳太笑言名牌手袋太貴，自己都唔捨得買嚟用。成班手袋黨成員見到三個手袋蛋糕雙眼發光，輪流同蛋糕合照，興奮到不得了。
大Sir鍾士元當晚都畀面到賀，陳太話年逾90嘅大Sir精神好好，記憶力仲勁。席間有個遊戲，要賓客講出三個壽星女幾時結婚同退休，大Sir最心水清，記得鄧蓮如1988年結婚，1995年退休。陳太63年結婚，三人中最早婚，方寧生66年拉埋天窗。當晚壽宴共收到47萬元賀禮，全數捐畀陳太創立嘅「長者之光」計劃，連同過去一年籌款共128萬元，可資助80位白內障長者做手術。
君悅手袋蛋糕200幾蚊磅，不過有錢都未必訂到，因為係酒店為VIP特製，其他餅店訂做立體手袋蛋糕價錢差唔多。