兩個免費電視台節目冇乜睇頭，電視台高層新聞仲精采，TVB噚日公佈業績，同時宣佈集團總經理李寶安升呢做執行董事兼坐入董事局做行政委員會成員。無綫有人「安」全接棒之際，亞視亦進入「盛」事年代，ATV噚日宣佈，董事局前日通過任命盛品儒做執行董事，即日生效。盛品儒係亞視新股東王征堂弟，「黃馬褂」入局，意味王征開始介入亞視日常運作。
無綫宣佈李寶安升職份通告，透露1月底已簽咗一份為期三年嘅合約，當時TVB同四大唱片公司談判版稅僵持，隨即傳出志雲失勢甚至唔撈消息，江湖傳聞今次志雲風暴都係李寶安一手策劃，原來佢早已手握大權，背後發功自然一擊即中。
盛品儒係留園少東
李寶安新合約年薪未計花紅達400萬元，媲美陳志雲，兼且晉身董事局，邊個先係六嬸新寵，顯而易見。李寶安係資深會計師，92至96年做過亞視行政總裁及董事，佢喺TVB上位快過直升機，07年做財務及行政總經理，排名在志雲及鄭善強之後，舊年9月卻爬頭榮升集團總經理，不出半年做埋執董。無綫原本有三個執董，分別係六叔、六嬸同梁乃鵬。
王征當ATV係家族生意，表明會搵親戚坐鎮。盛品儒係本港上海菜館「留園」少東，佢同姑姑盛毓敏本月中已經做咗亞視董事。王征本姓盛，係清末富商盛宣懷家族後人，因父母離異，佢改跟媽媽王雲飛姓。
據知亞視董事局前日開會，臨時動議委任盛品儒做新增設嘅執董，由於盛品儒冇媒體經驗，蔡衍明一方兩名董事投棄權票，接近蔡氏人士指亞視有股權訴訟，嚴格而言不應委任新人入局，咁做係漠視香港法律，當廣管局冇到。
mailto:[email protected]