雖然復活節仲有個零禮拜至到，但近日股場假期氣氛已漸濃。
下周二港股期指結算，之後踏入4月初，就有5日紅假。家陣呢個環境可謂無風不起浪，個別股份有消息都係只炒一陣，而且過程可能好短癮，霎時又會變得靜局，如果隨便追入，可能要坐艇。
波羅的海指數呢輪冇乜表現，但航運股卻現強勢，昨日中國遠洋（1919）升3.6%，收報10.42元。另一隻中海集運（2866）都有1.2%升幅，收報3.21元。不過，並非整個板塊都跟升，好似剛派成績表的中外運（598），業績後即見光死，股價下挫近6%，失守2元，收報1.99元，成交量激增至1649萬股，估計短線仲未跌完，若然再跌，可考慮在1.80元左右低吸，作中線投資。
其實航運業最壞情況已過，運費亦漸見調升，連中外運管理層亦承認，各項運費增長都比去年有所提升，將有利集團業績今年勝舊年。大市氣氛轉靜，不妨留意呢類行業復蘇股。
方星俠