律政司司長黃仁龍民望長年企穩，全賴佢深諳唔做唔錯，講多錯多呢個真理。法律超人謝偉俊噚日喺立法會財務委員會特別會議上，批評黃仁龍太錫身，只顧保住民望，唔願上陣幫政府護航，好似公投被指違憲呢個問題，就好少見黃仁龍企出嚟鬧公、社兩黨，如果黃仁龍挺身指公投違反《基本法》，會少啲爭拗。
其他好似高鐵一地兩檢、強拍條例等等，市民都有好多意見，有啲人對事件涉及法律理據唔清唔楚，黃仁龍身為政府最高級法律顧問，卻蹺埋雙手合埋把口，唔幫口解釋，份糧都幾易喎。黃仁龍否認明哲保身或者係縮骨，話呢啲只係謝偉俊個人觀感，不過佢都會返去檢討。