無聲抗議係最和平嘅宣洩方式，之不過NBA「魚腩王」網隊嘅CEO約馬克就唔同意喇！事緣佢周一喺球隊主場以89:99不敵熱火嘅比賽，見到一個戴住紙袋、成個犯人咁嘅球迷里斯（圖），就怒問佢點解打扮成咁。里斯竟然回敬一句：「因為網隊打得太好啦！」搞到約馬克即時「眼火爆」，好彩雙方最後冇發生不愉快事件！我求大俠絕對支持里斯，皆因網隊今季打到不知所謂，季初18連敗、主場14連敗，暫時戰績為7勝63負，只係剩番12場波畀網隊打破歷來最差球隊戰績紀錄（76人的9勝73負）。約馬克咁有精力發火，不如諗吓點搞好隊波啦！