港人李慨俠月初見完達賴喇嘛，香港「公安」對佢產生莫大興趣，早前盤問咗佢三粒鐘之後，日前又發信畀佢，列咗十條問題。李慨俠向警方申請註冊「香港藏漢友好協會」，搞咗好耐都未批，警方非常認真審批呢宗申請，一再要求李提供資料。
李慨俠話達賴都支持「香港藏漢友好協會」，警方就問，達賴係以人力定財政上支持佢？李慨俠話想邀請達賴訪港，警方又問，叫達賴嚟做乜？李慨俠已經書面回應警方，佢話達賴只係精神上支持協會﹔請達賴訪港，做嘅一定係合法、合理嘅活動。
警方仲問及協會對達賴主張西藏自治嘅睇法，總之，警方嘅問題似乎係出於中央嘅關注多過警方程序所需。李慨俠話，警方審批協會嘅手法已經構成干預結社自由。佢仲好寸嘴咁話，除非警方已經承認西藏獨立，否則根本毋須擔心佢哋勾結「外國」勢力。