南韓體壇真係靚女多籮籮！呢排人氣最勁嘅，當然係前排喺溫哥華冬奧揚威嘅「花樣滑冰天后」金妍兒啦！之不過喺高爾夫球界聞名嘅美籍韓裔球手魏聖美，亦都有好多「粉絲」o架！而佢周一仲同麥記簽約拍廣告做「夢想大使」呢！
形象健康宣揚慈善
愛心爆棚嘅魏聖美，今次願意簽約為快餐連鎖店麥記拍廣告，主要目的係想藉廣告宣揚夢想嘅重要性；佢嘅廣告主題就係「成功與成就」，20歲嘅魏聖美話：「我自小就相信自己嘅才能，總抱有遠大嘅夢想迎接挑戰，所以我今次好高興可以同麥記合作，為小朋友宣揚夢想嘅訊息。」
喺夏威夷出世嘅魏聖美，能夠成為職業高爾夫球手，亦經歷過長年嘅艱苦訓練，自4歲起就打高球嘅佢，喺16歲就正式打職業賽，仲喺09年11月贏得首個職業賽冠軍，而令現時世界排名第9位嘅魏聖美屢敗屢戰嘅動力來源，就係佢心中永遠夢想要登上世界第1嘅信念；魏聖美高䠷嘅身形、笑容滿面嘅正面健康形象，亦為麥記搵佢做代言人嘅原因，皆因麥記近10年內都冇搵高球手宣揚社區慈善活動。
有5個語言版本
麥記市場總監尼域奇話：「魏聖美嘅平易近人、開朗性格，足以打破世界各國之間嘅隔膜。」為咗令世界大同嘅訊息更加明顯，魏聖美呢次嘅廣告將會有5個唔同語言版本面世，有廣東話、國語、英文、韓文，仲有菲律賓土語式英語（Taglish）呢！
呢個廣告首播日期就喺4月20日，魏聖美仲會出席麥記下月喺奧蘭多嘅活動，想睇嘅球迷就要耐心等吓喇！
今次魏聖美同麥記簽約已經係佢轉投新嘅經理人公司IMG後嘅第2份合約，南韓起亞（KIA）汽車公司喺2月就同佢簽咗約，加埋佢本身有Nike、Sony合約，同「廣告天后」金妍兒真係有得揮o架！