利物浦嘅西班牙翼鋒尼亞拿他日如果掛靴，不妨考慮做占卜師之類。點解？因為佢開口中囉！據英傳媒報道，尼亞拿嗰頭話利物浦係「沉船」，呢頭已經跳船，會喺呢個禮拜內加盟俄超球隊莫斯科中央陸軍。喺上個禮拜，尼亞拿出口猛插紅軍領隊賓尼迪斯，話佢同球員冇溝通，又話利物浦喺賓帥麾下係沉船；而尼亞拿因為呢次衰多口而被紅軍罰停賽。話口未完，喺日前，英傳媒已指紅軍已決定以600萬鎊賣走尼亞拿，將佢賣到莫斯科中央陸軍。唔知尼亞拿有冇後悔自己插得紅軍太遲呢？如果佢上年夏天加盟陸軍嘅話，咪可以踢今屆歐聯囉！