呢個3月，你男朋友應該唔多願出街，淨係掛住屋企打機。拍拖係要講求體諒，呢個勁Game月就係你哋愛情嘅嚴峻考驗！公道啲，男朋友們不如借部PSP畀女友，最好買埋呢隻《Prinny2》息事寧人，角色可愛玩法簡單，今集仲要加入Babyeazy模式，放心！你一定過到關嘅Baby！唔好阻住我打宙斯啦！
記者：阿樂
雜魚變主角
呢隻《Prinny2》係以「日本一」招牌戰略遊戲《魔界戰記》系列，雜魚角色企鵝Prinny做主角。呢隻貌似企鵝嘅嘢，體內其實係犯過罪嘅人類靈魂，藉住喺魔界做牛做馬嚟贖罪，屬魔界嘅低級惡魔。
上集同樣係喺PSP推出，副題係《我真的可以當主角？》，就係為主人魔神Etna找尋「終極甜品」，無聊？今集仲無聊！副題係《搶奪內褲大作戰》，故事係講某日Prinny如常忙於洗衫打掃偷懶瞓晏覺，點知就係因為Etna條底橫被偷，搞到呢班「鵝傭」要喺第二日早晨嚟到前搵番條褲，「否則我會把你們那骯髒的皮剝下來製成內褲！」Etna說，於是1,000隻陷入恐慌中嘅Prinny，就展開尋找底褲之旅。
超萌角色隱藏關卡
2D橫向捲軸動作類型，Prinny嘅動作又多又鬼馬，包括跑步、迴轉、衝刺、舉起、投擲等，一定可取得女玩家歡心。今集繼續有華麗動作同色彩繽紛嘅背景，並加入大量可愛怪物、性感魔女，感覺就好似睇緊超萌嘅動畫一樣；今集整體遊戲性亦得到強化，爆機之後可以更換角色繼續打隱藏關卡，即係可以用超可愛嘅魔女打。Baby！打到嗰度記得等我嚟！
辦法總比困難多
Prinny好脆弱，被攻擊或者掂到敵人就會爆炸！主打女玩家市場，太難玩實不太適宜；所以今集除有最難嘅魔界模式、中級Standard標準模式外，仲加入適合初心者嘅Babyeazy模式，不同難易度可觀看不同嘅教學導覽，亦可隨時變更難易度，當中Babyeazy模式，仲可叫出輔助地形Assistbloc，喺容易跌死嘅危險區域增設立足點等等，隻企鵝仲可以捱三嘢先死，真係辦法總比困難多呀！
Profile
遊戲：Prinny2
主機：PSP
類型：動作
人數：1人
製作廠商：日本一Software