揚言追擊黃毓民嘅白姐姐，噚日終於踏出參選第一步，高舉「打倒黃賭毒」紙牌同一支「打狗棒」去選舉事務處攞報名表，白姐姐有姿勢，唔知有幾實際啫。自由黨、民建聯同肥媽等人，據講喺阿爺威迫利誘下統統唔參選，八方問白姐姐會否打退堂鼓，佢初時恥笑人哋質素差，誓言一定去馬，後來可能覺得講得太盡冇彎轉，開個價兜番，「有可能（唔選），如果有得交換，例如畀個旅發局主席我做，我咪去做囉，又或者係威威嗰啲（職位），咁我咪去做，唔選嘞。」
補鑊話只係講笑
每個人都有個價，難得白姐姐明碼實價，睇中旅發局主席個位，想同代表旅遊界嘅男友謝偉俊拍住上，肥水不流別人「田」吖嘛！唔知係咪擔心叫價太高，白姐姐隨即補鑊，「我頭先係講笑」，忽然扮鵪鶉稱自己係nobody，相信中方「唔會當我係一回事」，至於謝偉俊對佢參選有乜意見，白姐姐話唔知謝偉俊撐唔撐自己，「佢唔會反對我選舉，因為佢反對都係冇用。」話雖如此，八方噚日見到謝偉俊助理全程幫白姐姐拍片，仲好似記者咁問問題。
唔止有法律超人暗撐，白姐姐又透露陶傑會畀橋佢挑戰毓民，外傳英皇楊老闆都有發功，白姐姐表示「會打電話問吓楊生係咪撐我。」至於詹培忠就免嘞，「佢成日都話凡女人都係雞，呢樣嘢唔係好啱傾。」
提議增功能組別
白姐姐稱噚日已喺旺角攞到幾十個市民提名，好有信心勝出，強調參選係要扭轉掟嘢歪風，因為毓民成日喺立法會掟嘢，搞到旺角、銅鑼灣都有人掟玻璃樽同鏹水彈，所以佢要出馬撥亂反正，同時向毓民發出「最後通牒」，限時毓民48小時內報名，否則佢唔打癲狗，轉打儍狗，即係梁家傑。
好多市民想廢除功能組別，白姐姐卻反其道而行，政綱建議新增五個功能組別，包括主婦、職業婦女、55歲以上耆英、殘疾人士同埋80後，如果今次選搞笑程度，白姐姐，youwin。
mailto:[email protected]