港人自恃身處國際城市，但對國際盛事認知度低。如禮拜五開鑼、一連三日的國際七人欖球賽（HongKongSevens），每年例牌吸引逾萬海外旅客飛撲來港睇波，大夥兒在場內邊扮超人特攻隊蝙蝠俠邊舉酒杯，氣氛超High；但大球場外大談Sevens，卻竟無人知七人欖球源於香港！OMG！趁今屆港隊出戰華人首次佔半數，找來兩位欖球王子，講講早已熱爆全球的Rugby文化，何解流行程度遠不及悶爆花車巡遊。
記者：蔡俊業
攝影：陳盛臣、譚盈傑、蔡俊業
部份圖片由HKRFU/HKSPA提供
卓銘然（Ricky）28歲（左）
01年首度代表香港參加國際七人欖球賽，因成功達陣聲名大噪。07年任港欖史上首位華人副隊長，09年正式退役。現職基金經理。
王俊喬（Jeff）25歲（右）
06年正式加入港欖代表隊，今年出任隊長，為史上首位華人任此位。正職I.T.Broker。為備戰日做16小時Gym。
無廁所位一睇上癮
小記兩年前首次接觸欖球，絕對是大鄉里出城，見人歡呼就一齊歡呼，香港隊出場就落力點叫加油順便攞簽名！到舊年再入場，對賽制認識深了，自己的投入程度亦大了很多。由於比賽只有14分鐘，而且每場只有1、2分鐘休息時間，賽程緊湊絕少冷場，嚴格來說幾乎全日無廁所位，仲要間唔中有人陪你一齊大合唱，又可以同賣啤酒的靚女團影相，點會唔一睇上癮？難怪今年就算門票由$1,080加至$1,250，依然「Sharp」一聲售罄。
「國泰航空/瑞信香港國際七人欖球賽2010」
日期：26/3-28/3
網址： http://www.hksevens.com/chi-index.html
越多華人出戰越矚目
真的假不了！香港舉辦的國際七人欖球賽確實超多擁躉，可是很多香港人對這場享譽國際的賽事得兩大反應：「唔識喎！咩嚟？」及「係鬼佬先睇啫！」可小記已連續兩年入大球場睇波，場內場外的氣氛差距委實太大，弄得我誤以為剛才進入了異度空間。點解Rugby硬是在港Hit不起？
曾是港隊代表的卓銘然（Ricky）：「可能對一般人嚟講，一個周末要花幾千蚊係貴咗啲。」至於現役港隊隊長王俊喬（Jeff），上星期六才出席完港隊記者會，他說就媒體報道的多寡來衡量，欖球在香港的發展算是日趨普及，「呢兩年香港隊多咗好多Exposure，喺我啱啱打嘅時候，只係得一兩個記者採訪，家就七八個訪問。」經驗較豐富的Ricky指，港人是否撐港隊，與隊中華人數目及比賽表現有關，「多華人打嘅，嗰年反應就特別好，又例如舊年東亞運我哋贏咗銀牌，香港人對港隊都會熱情啲，因為佢哋發現原來有八九個華人球員，對比我打嗰陣得一兩個，好難令人覺得呢個真係香港隊。」
港欖球隊向來是外國人天下，未計今年，過去10年，僅2006年那屆12名代表中有5名華人球員，直至去年更剩下Jeff一人，「我本身喺英國讀書，有年暑假返嚟諗住搵嘢玩吓，就搵咗欖球，有人問我點解唔去參加香港隊選拔？我根本都唔知道有！」所以要為港隊添新血，也很靠有志者「自投羅網」，像今年首度晉身港隊的姚錦成。
全職才是王道
姚錦成今年才22歲，自小在新界北區長大，中學時代翻報紙體育版，瞥見港隊五虎推廣RugbySevens，Ricky便是其中之一，「當時我心諗，點解呢項運動咁唔重視華人呢？好想知道係咩嚟。」碰巧中學老師有門票，「係我第一次去大球場！」一去，眼界大開，「氣氛好好，坐滿人，外國人多到好似去咗外國咁。」接下來賽事緊張刺激是必然的了，於是四處找機會參加訓練班，由於是田徑校隊出身，速度快，被教練相中，經多年時間終於今年成為港隊代表之一。阿成現時還全職當欖球教練，他說欖球的確普及了，「以前很少新界學校有Rugby班，現在不只中學，連小學都有開班了。」
畢竟，亞洲人面對身形魁梧爆炸力強的西洋選手毫無着數，但Ricky指近年港隊已找到定位，因競賽模式已轉，亦有利欖球發展。「以前打Sevens要快要碰撞要大隻，家講求速度同技巧，好似扭波、交波、腳法同個人突破，大隻唔一定打得好。」當然，講到尾，香港欖球隊要爭取更好成績，Ricky及Jeff均認為長遠計還是要將運動項目轉為全職。Jeff坦言：「要確保球員生活、薪金前景、運動知名度、聯賽數量（全港暫有6個甲組欖球會，每周舉行聯賽）等等，呢啲都要考慮，香港暫時仲未做到。」Ricky認同：「無嘢好得過一起身成個人就係諗住練波。」雖然男子七人欖球近日被列體院精英訓練資助項目，但Rugby要在香港全面Hit起來，相信還有很遠的路要走。
它來自香港
欖球賽源自英國，據說是由十九世紀一場大學足球演變過來。傳統欖球賽以15人作賽，由於人數多，推進慢，於是到1976年，香港欖球總會在港試辦首屆國際七人欖球賽，由於場地面積沒變，各球員要達陣得分，就必須跑多幾步，令比賽更刺激。每場限時14分鐘，設上下半場；簡單而言有4種得分方法：
1.球員進入達陣區將欖球放在草地上，即達陣成功，可獲5分。
2.達陣成功，勝方可再射一次附加罰球，就在達陣所在點的20碼前面射門，中門者可再獲2分。
3.罰球，如攻門成功可獲3分。
4.落踢射門，在球場任何一點射中門，可獲3分，但難度最高。
今年共有24隊角逐，分銀盃、銀碟、銀碗及銀盾四級。
後記
舊年3月，小記的祖母剛過身，難過非常，但同一個星期RugbySevens開鑼，因工作關係要到大球場採訪，趁空檔看了幾場賽事。未知是否受到現場熱烈氣氛感染，我竟然可以High到同在場所有人一齊唱歌，咬牙切齒的叫港隊加油，感到好像暫時釋懷了，能夠令人自動自覺全情投入，這大概是看Rugby的魔力！
