前美國國務卿CondoleezzaRice教授於三月十九日抵港，逗留一日就前往海南參加博鰲論壇。來港一日，唞唞氣，稍為抵銷jetlag先至去參加論壇，係養生之道，雖然話康多莉扎．賴斯教授在布殊總統年代，早已習慣飛來飛去，但離任十六個月之後，心態與體力都與在任時有所不同，唔需要好似以前咁搏命吖。
賴斯以前係史丹福大學首席副校長（Provost），與一位資深教授認識二十幾年，成為好朋友，此次經過香港，就俾好友力邀，訪問中文大學，演講一番。呢位資深教授就係現任中大校長劉遵義。賴斯到中大演講，講題係"TheFutureofAsia"，只見佢口若懸河，滔滔不絕，極少睇講稿，講足一小時，再回答問題。世界級高手，示範一次何謂公開演講技巧，在場嘅高官律政司司長黃仁龍以及立法會主席曾鈺成，應該領會到，左丁山呢類小人物，梗係要寫個服字。
之不過講到內容，聽得出賴斯女士對伊拉克、阿富汗、伊朗、北韓嘅問題最熟，最分析透徹，一講到「非安全議題」（non-securityissues），例如經濟發展等，就比較老生常談，無甚高論，至於美國內務，佢就表示最擔心（一）移民政策趨向保守，反移民，妨礙吸收國際精英，令佢憂心美國行將失去競爭力，（二）美國教育在中小學方面，得過且過，不求最低測驗標準，不少人讀書水平低，算術差勁（例如一位學生對賴斯講，九乘五等於四十），幾得人驚。
講到亞洲的未來，其實賴斯只注重南亞恐怖活動與重建中東秩序，驚住伊朗發展核武器，與以色列反面，釀成世界災禍。至於北韓核武，反而唔係幾驚，因為中國相當合作，全力促成六方會談，主動㩒住北韓。賴斯話美國中小學教育唔得，但在場有一位協恩中學女生發問，英文講得相當唔錯，賴斯即刻問：「你讀第幾班？」顯然對呢位女生留下好印象，女生答讀緊中六，賴斯又問：「你會入大學吖嘛？」唔，呢位協恩叻女不如索性就寫信去史丹福畀賴斯，請佢幫忙申請入學啦。