香港近年好多學校因為收生不足被殺校，不過有時不足嘅唔止係學生，好似慈雲山女校德愛中學，佢哋嘅辦學團體聖母無原罪傳教女修會噚日宣佈，因為修會喺教育服務方面唔夠人手，決定向教育局申請將中學辦學權交出，交畀同樣以天主教理念辦學嘅東亞教育促進會接手。
神父、修女買少見少係全球性問題，教會學校人力資源唔夠係難以解決問題，校長劉惠蘭稱新接手嘅辦學團體承諾，教職員人手及一切日常運作會保持不變，學校亦會繼續維持英語授課嘅女校模式，學生、家長唔使擔心。東亞喺93年已經接辦修會喺尖沙嘴嘅德信學校，於千禧年創立德信中學，相信今次接手都冇問題。