古天樂同吳君如早排去咗內地橫店拍陳可辛監製、谷德昭執導嘅新戲《神奇俠侶》，噚日專程返港喺灣仔會展出席潮流戲服catwalkshow，古仔同君如着晒戲服現身，可能因為合作得多，佢兩個好有默契。君如仲當住陳可辛面前講話同古仔拍床上戲拍得好開心，又話去到橫店煮埋飯畀古仔食，反而喺屋企都冇煮畀老公食，古仔就猛話：「正呀！」古仔仲話拍第一場床上戲，拍到一半陳可辛就走咗，君如即刻接住話：「係呀，後半段我哋好開心好放。」
幫古仔痕
其實戲入面講古仔同君如係老夫老妻，大家都擁有超能力，所以床上戲要造出非一般嘅高難度動作，君如話：「唔係普通人方式，拗晒腰，掃到枱面杯碟爛晒。」除咗有多場床上戲，古仔嘅動作戲仲多，佢話：「真係非一般性辛苦，尤其我着住件超人衫，背脊痕又唔到，好彩有君如幫我痕。」
另外，據聞無綫想搵君如頂替陳志雲主持類似《志雲飯局》節目，君如話從來冇人搵過佢，但就算有都肯定唔會做，除咗因為拍戲太忙之外，主要係想見好就收，唔想死做爛做，清談節目做得太多啦！要做都會諗過其他類型節目。