倡議最低工資廿蚊或以下嘅自由黨飲食界議員張宇人近排真係犯眾憎，網民恥笑佢應該改名張廿蚊，facebook群組「強烈要求張宇人用時薪20元生活比我哋睇」成立幾日，已經有逾兩萬人加入，張廿蚊人氣爆晒燈。八方聽聞自由黨內對張廿蚊不滿者眾，尤其係區議員同想參選區議會嘅黨員，埋怨今次多得佢唔少。
己所不欲，勿施於人，有網民建議政府調整議員薪酬，尊貴議員薪金改以時薪計，每個鐘頭20蚊，睇睇張宇人如何生活；亦有網民指功能組別議員先講得出咁無良說話，因此一定要廢除功能組別呢個政制怪胎。另有人成立「身為拔萃仔，我為張宇人是我校董感到羞恥！」群組，對張宇人呢位學兄好不滿，有幾百人加入，紛紛表示「張宇人不代表我。」