家啲電腦產品銷售周期越嚟越短，好似啲Netbook、Notebook新機出咗三幾個月，就會當舊款機係咁跌價。如果消費者唔係追求新款，買呢啲舊款機起碼平兩、三成。好似電腦代理商漢科呢個禮拜六（27日）舉行盤點大減價，清貨電腦產品低至三折。
不清貨蝕倉租
漢科董事總經理Kandy話，公司過去一年會開倉一次清貨，但家啲貨「舊」得快，一年要開兩次倉，「全部蝕本價發售，志在清晒啲貨，唔使蝕倉租。啲貨越拖得耐唔清越蝕得犀利。既然係咁不如劈勁啲、快啲，等啲客買得開心。」
Kandy話，今次減價嘅電腦產品款式有400幾種，重點推介嘅Netbook微星WindU100，只係出咗三個月，原價$3,290，開倉價$1,898，減幅42%，限售13部，「呢批係陳列品，機身可能有啲花，係性能冇問題，同樣提供一年保養。」
Kandy又推介話有幾款外置硬碟機都幾筍，好似高清錄影專用Buffalo250GB3.5吋嘅外置硬碟機原價350蚊，減價26%賣260蚊，限售50部。TrekStor320GB2.5吋流動硬碟，原價610蚊，勁減35%，賣399元，限售20部。而今次更因應一啲鍾意DIY砌電腦嘅顧客要求，大量底板、機箱等劈價七成出售。開倉地點喺觀塘鴻圖道44至46號世紀工商中心閣樓，朝10晚7，只限一日。
電郵：mailto:[email protected]