早前亞視（ATV）節目《香港亂噏》以扮嘢高手諷刺時弊，竟成功突破低收視。無綫見觀眾受落即照辦煮碗，前晚汪明荃便率領阮兆祥、王祖藍和李思捷錄影新節目《荃加福祿壽》，一樣扮鬼扮馬，其中祥仔扮「陳棍聰」唱歌，李思捷則「張鐸友」上身和扮小忌廉的阿姐出言寸亞視收視水皮。
汪明荃（阿姐）前晚戴紫色假髮穿短裙扮小忌廉，在將軍澳電視廣播城錄影無綫新節目《荃加福祿壽》，除了有阿姐做主持外，三位扮嘢高手阮兆祥、王祖藍和李思捷也一同演出。之前盧海鵬等人扮鬼扮馬主持亞視節目《香港亂噏》得到不俗反應，無綫似有樣學樣又製作這個扮嘢搞笑節目。
當晚阿姐扮小忌廉，祥仔就戴上頭套穿西裝自稱「陳棍聰」唱歌，他抵死地說：「我呢排匿喺屋企種花、種田咁，但近日種錯咗，種蕉呀。」祥仔又唱出改了歌詞的《誰可改變》，當中歌詞改為「風水痴戀，有山窿要掘，我逐個捐，同你合照，開心影相，你真靚絕，誰話我不愛人愛錢，千億美夢定變真，誰想討厭」相當抵死。
「收視點都過兩點」
李思捷則扮拿手的「張鐸友」，阿姐搞笑謂：「你同鐸叔有乜關係？你多啲上嚟，因為收視點都會過兩點。」擺明寸早前張學友做亞視特輯時收視僅得兩點而已。王祖藍就「LadyTiger」上身，接着眾人又一起扮韓國人氣少女組合WonderGirls又唱又跳。
提到在節目中扮鬼扮馬，阿姐說：「我每集都會有唔同造型，幾得意，冇咁悶，以前我做《歡樂今宵》都冇乜機會扮嘢。」祥仔被問到扮陳振聰，話題敏感，他則詐儍扮懵說：「乜敏感，皮膚敏感呀？」
當晚古巨基擔任嘉賓，但他沒有扮嘢。問基仔若要他反串會否介意？他說：「以前我做《娛樂新聞眼》都扮過嘢，但真係唔記得有冇反串過。」有否再約無綫總經理陳志雲食飯見面？他表示暫時未有，可能待事件水落石出後才再約見面。
採訪：藍文浩 攝影：陳俊強
