吳彥祖（Daniel）近日身兼男主角及監製的新戲《如夢》，前晚在灣仔舉行首映，Daniel的媽咪及家姐到場打氣，不過女友LisaS.因有工作在身未能出現。與LisaS.拍拖多年的Daniel坦認兩人未有設防，隨時一擊即中做老竇。
近日由吳彥祖主演及監製、羅卓瑤執導的新戲《如夢》，成為「第34屆國際電影節」的其中一套開幕電影，前晚在會展舉行首映，貝安琪與緋聞男友尹子維一同出現，另外Daniel的媽咪及家姐也到場打氣，圈中好友如24味、楊凡、馮德倫、施南生及林建岳等亦有出現，曾和Daniel傳緋聞的楊千嬅則單拖出席，而正印女友LisaS.因有工作在身未能撐場。
「結婚為生BB」
首映後會否問媽咪及家姐意見？Daniel笑說：「佢哋乜嘢都話好，太錫我，唔夠坦白，女朋友啲意見都OK。」提到媽咪有否催婚？Daniel笑說：「雖然冇，不過我諗佢想，其實如果家結婚，都係為咗生BB。」
會否擔心做高齡老竇？Daniel表示不會，他又踢爆家姐43歲才首次生BB，而老父更是在45歲才生他，兩人相處間也絕無代溝問題。問現在和LisaS.是否已沒有做安全措施？Daniel直認：「冇o架，有咗我都唔擔心打亂工作，咁有9個月時間，如果生咗，我之後一年就唔做嘢，全心陪老婆同BB。」
千嬅拒大肚開騷
在場記者向千嬅提到Daniel準備做老竇，千嬅笑說：「我唔係唔想，但我又要搞結婚又要開concert，大肚點唱歌呢？男人就瀟灑啫，但女人好大犧牲，男人最緊要就係有優良品種。」
另外，問到同場的馮德倫，其緋聞女友徐若萱大讚他是好男仔，若果追求定必接受，他聞言只說：「哦。」但就直認早前女方生日時有傳SMS祝賀。
採訪：張俊銘
攝影：仇志德