繼「事旦男」喺無綫記者做live時舉牌諷刺無綫新聞之後，有人有樣學樣，但今次被「突襲」嘅係有線記者。噚晚7點37分，有線記者譚嘉恒喺旺角行人專用區做live報道空氣污染爆燈時，突然有人喺佢後面，高舉一幅寫住「有線最無恥 還我世界盃」嘅紙牌，喺畫面左邊經過，為時約三秒，仲吼正譚嘉恒講到一半時出招，搞到有線cut唔到。
「世盃男」用紙牌遮住個樣，身形似中年人，着藍恤衫、深色褲，孭住個袋。但佢舉得唔夠專業，個「恥」字睇唔清。事旦男否認今次係佢搞鬼，因為佢對世界盃播映權爭議冇興趣。高登討論區上，署名「有線打手」嘅網民就自認係世盃男。
有線新聞及體育執行董事趙應春回應話，對事件唔意外，「家香港地各式各樣鍾意點樣表達都有」。佢話唔會叫前線記者刻意去避「世盃男」，亦唔會喺發出同類情況時cut直播。