網上近日流傳一封英文電郵，話有兩個女人喺海洋公園試圖拐走一個唔夠3歲嘅男童，幸途人及時發現。海洋公園噚日發聲明，否認發生過小童被拐事件，電郵內容純屬虛構，已向警方備案要求調查。
海洋公園話部份同事都收到呢封電郵，所以主動調查，但冇紀錄或證據顯示園內曾經發生拐帶事件。
封電郵話，有個媽咪同佢囝囝某個星期五去海洋公園玩，其間兩個中國籍女子走近，其中一人抱起男童拔足狂奔，幸途人發現追捕，兩女放低男童逃走，個媽咪向園內保安投訴，有保安員仲話係過去三星期發生嘅第二宗拐帶事件，男童母親於是報警。八方噚日問過警察公共關係科，警方話今個月至今嘅三個星期五，999報案中心都冇接過市民報案話有小童喺海洋公園被拐帶。