印度加息，居然成為利淡香港股市藉口。不過，市場力量冇得拗，係跌就係跌，港股昨日大插超過400點，恒指失守21000關。
內銀股昨日全線下挫，唔少人都估計一眾內銀股派完成績表後，就會掀起集資潮，所以沽壓唔輕。
近期大市成交持續偏軟，昨日只得555億元，復活節長假期臨近，若然到時內銀股又排隊抽水，個市唔容易炒得起。有口痕友亦話，呢輪港股冇乜氣氛，主要受太多客觀因素影響。換言之，個市仲要捱多一陣，先至有睇頭。
炒業績股係淡市之選，好似股價異動的春天百貨（331），市場預期公司月底公佈之業績應交到功課，上周五股價由2.60元水平一舉炒上2.80元後，昨日餘勢未了，曾逆市升至2.88元，惟高位略見回吐，跌1%，收報2.77元，不過沽盤唔算猛烈，業績公佈前或再有炒作。
短炒可吼春天股價守穩2.70元水平買入，升上3元至3.20元食糊，失守2.50元止蝕。
方星俠