甄子丹、熊黛林（Lynn）、導演葉偉信同埋成班幕後工作人員，噚日去到香港國際影視展宣傳新片《葉問2》，吸引東南亞過百記者採訪，不過重點就擺喺好男人嘅話題上面，主角甄子丹就話戲入面自己個角色就好似一個好好打嘅宅男，仲話「男人想像他、女人想嫁他。」
自認靚仔有風度
甄子丹話自己確實係一個好男人，因為無論幾忙都好，自己都盡量要每晚7點半就準時同老婆食晚飯撐枱腳，就算開緊工都要打個電話畀老婆喎！之後大會司儀問佢好男人嘅定義係乜，甄子丹一邊讚自己一邊旁敲側擊問着住Dior低胸裙嘅Lynn，佢話：「我就係人辦啦，好男人要有經濟能力、有風度同埋一定嘅賣相，熊小姐你已經搵到啦，你個好男人喺邊？」
無啦啦俾人交個波過嚟，阿Lynn接唔住，尷尷尬尬咁笑住話：「還在找。」完全冇反擊能力。之後Lynn答記者時先識話好男人一定要喺外面為家庭拼搏，返到屋企又要錫老婆仔女。問佢城城符唔符合呢個條件，佢就話喇：「佢幾好男人，個人幾好。」仲甜笑咁話可能係因為城城優點多到掩蓋晒所有缺點，但係問佢哋幾時先會公開關係，佢就一面為難咁話：「冇諗過呀，任何事都順其自然啦。」之後又話佢同好多女仔都覺得城城好好，但係又解釋話唔係因為多女仔埋城城身所以唔公開關係喎。
葉偉信寸周杰倫
到場採訪嘅台灣傳媒問導演葉偉信係咪有諗過搵周杰倫扮李小龍，葉偉信臉色一沉話：「過去的事就不要說了，證明我很走運，他答應我就慘了！」言語間寸爆周杰倫。《葉問2》已經拍完仲谷緊宣傳，但王家衛執導嘅《一代宗師》仲拍緊，《葉問2》監製黃百鳴揶揄話：「那我們《葉問3》暫時不拍，讓《一代宗師》先出來。」甄子丹都好抵死咁話：「希望早日拍完，生命很短暫。」