「我哋唔係垃圾！」今次爆出呢句豪情壯語嘅，唔係香港運動員，而係澳門工人。
上星期六，呂志和旗下嘅澳門銀河娛樂城招工，有人爬欄杆有人推鐵閘，仲搞到差啲人踩人，事後唔少傳媒都大事報道呢個墟冚嘅場面，亦有工會人士認為反映澳門失業嚴重。但原來當日有人拍咗段片放上網，片中有應徵者發現啲申請表轉個頭就好似垃圾咁，被放喺泥水車同垃圾袋入面，即時引發群情洶湧，有求職者質疑係咪假招工。
發佈者稱銀河已聘外勞
呢段片分兩部份，喺YouTube兩日來分別有萬二同近六千人次瀏覽。片中所見，有求職工人首先發現，一大堆已經填好仲釘埋身份證明文件副本喺上面嘅申請表，被人放喺一架手推泥水車斗入面，圍觀嘅求職者即時起哄，有人大鬧「當澳門人係垃圾！」大家又起勢咁摷，想搵番自己張表，有位阿嬸仲話「複印都要錢o架！」有位操普通話嘅阿叔仲批評，咁樣處理啲申請表，係對澳門工人「不尊嚴」嘅對待。
有個相信係銀河職員嘅女士見狀想嚟攞返啲表，但即時遭求職工人喪鬧有冇搞錯。據拍呢段片嘅澳門人阿Roy講，當時有個求職工人去廁所，先無意中發現啲申請表被人放喺泥水車斗度。第二條片仲搞笑，拍到個黑色垃圾膠袋入面有好多填好嘅申請表。段片嘅文字介紹仲引述消息話，銀河已申請咗幾千個外勞名額，根本唔會請澳門工人，招聘會係一場騷。
公關指合資格者會面試
銀河娛樂集團公共關係部噚晚回覆，矢口否認假招工，並強調好尊重每位求職者，當日發現申請表被放喺泥水車之後，職員已立即將表格收回並處理好，又有人搶走啲表放落垃圾袋兼威嚇佢哋啲職員。銀河娛樂仲話，當日派出同收回約2,000份表格，佢哋已將申請時間延長至今日，明日開始為合資格人士面試，確保合資格嘅澳門居民都有個公平嘅面試機會。
mailto:[email protected]