香港最鍾意拆晒啲舊嘢，1960年著名荷李活電影《蘇絲黃的世界》嘅女主角關南施（本名關家蒨）近日重臨香港，仲重遊當年電影取景嘅地方，包括昔日位處海邊嘅六國飯店，今年70歲嘅關南施睇到今日面目全非嘅景象，好欷歔咁話，舊時嘅香港真係好迷人。
變得越來越陌生
關南施來港主要出席今日開幕嘅香港國際影視展活動，一齣有關佢嘅紀錄片亦會作亞洲首映。
喺香港土生土長嘅關南施半世紀前因為《蘇絲黃的世界》揚名，進軍美國發展演藝事業，後來移居洛杉磯。佢每隔幾年會返港一次，不過佢發現，香港變得越來越陌生，仲笑言「經常迷路」。佢覺得，以前香港一啲殖民地建築好典雅，拆晒好可惜。
《蘇絲黃的世界》中，關南施同男主角威廉荷頓嘅愛情故事由天星小輪展開，天星碼頭、六國飯店、香港仔避風塘都係故事場景，但呢啲地方，都已經唔同晒樣。