彭定康退出政壇之後，做咗牛津大學校監，喺三月十六日在英國政府「高等教育撥款委員會」公布大學預算前夕，發表講話，指英國大學應該加學費。自二○○三年起，英國大學學費（本國及歐盟學生）全年三千二百英鎊（現相等於港元三萬七千幾，香港學費係每年四萬二千五百元），相當便宜。彭定康覺得不同大學應該有不同收費，令大學有所區別。呢啲說話梗係唔啱聽啦，美國就得啫，哈佛耶魯大學嘅學費貴過州立大學好多，而加州大學學費又比中西部州立大學貴，但英國係平均主義社會，牛津劍橋呢兩間名牌大學如果收哈佛耶魯式學費，比利物浦大學等個別城市大學高出一倍嘅話，英國人好可能反應激烈。
彭定康話牛津每年用一萬六千鎊教育一名學士，半數自學費及政府撥款收回，另外一半就靠牛津大學基金提供，非長久之計。基金投資，可賺可蝕，例如一場金融海嘯，就令哈佛耶魯嘅投資損失慘重，被逼大力削減預算，牛津基金總數少過哈佛好多，遇上經濟危機嘅話，牛津好易入不敷支。
加學費是理智之方，但歐洲大學嘅學費，講政治講選票多於講理性分析與財政實務，一講加學費就會引發學生上街示威潮，令政府頭痛，弱勢政府通常唔敢講、唔敢提，只敢向大學施壓、緊縮支出及科研經費。英國國寶霍金不久前就發牢騷，指出英國政府再削科研基金嘅話，佢會遷居加拿大，不再回頭。
好多學界人士都認為去英國讀大學，攻讀哲學經濟法律文學歷史等等學科嘅話，仲算OK，但要讀科技，美國大學啲實驗室設備就更加齊全與先進。肥仔K在倫敦讀碩士之時，親身體會到學校缺資源之苦，學校現實與學校網頁之宣傳有好大落差，上課時佢贊成加學費，被同學圍攻，幾乎難以脫身。想唔到現在彭定康竟敢以個人身份，呼籲英國大學增加學費，可見英國大學財政已經左支右絀，唔能夠唔出聲嘞。