復活節除咗復活蛋之外，仲有咩應節食品？小妹嘅朋友仔Kaman就介紹咗教會最近引入嘅意大利鴿子蛋糕（Colombacake）（圖），呢種蛋糕清甜芳香，形狀似白鴿，喺意大利有過百年歷史，復活節家家戶戶都有一個看門口。
Kaman噚日去李嘉堂宗教禮品中心，拎咗一個原味，一個黑朱古力碎外層加威士忌忌廉餡畀小妹試，原味面層係糖霜同埋杏仁，食落清甜唔覺膩；酒味面層嘅朱古力來自意大利，味道香濃，所以好受消費者歡迎。
負責入貨嘅神父呢個牌子喺意大利銷量三甲，上年美國消費者調查仲成為至好味榜首；除咗原味，仲有檸檬味、朱古力味同櫻桃味。
李嘉堂店務經理黃鳳屏話，最平嘅500克「枕頭裝」（無盒）只係58蚊，來貨唔夠一個禮拜已經賣晒，其餘850克同埋1公斤裝，每盒賣118至138蚊。家淨係定單都已經超過500個，詳情可電：27111866。
神父話，其中一個講法係1160年腓烈特一世進攻意大利，當時教宗亞歷山大三世支持嘅軍隊奮力抵抗，卒之腓烈特軍隊大敗，保護咗教會，戰事後天空出現咗兩隻鴿子，後人為咗紀念，就整咗鴿子蛋糕，成為蛋糕起源其中一個版本。
電郵：mailto:[email protected]