如果喺10幾年前已開始睇波，冇可能唔識鼎鼎大名嘅韋利，舊年傳過佢轉做職業撲克手、會遠赴巴甲發展，結果都係冇米粥。講到尾，佢搞服裝生意咁多年，呢瓣至係佢最耍家，冇理由唔熟唔做。又有錢搵，又可親身上陣過吓model癮，何樂而不為？
韋利幾年前同老友馬甸尼一齊成立服裝品牌SweetYears，球迷唔善忘嘅應該記得佢未淡出球壇時周不時揭起波衫，露出自家品牌嘅心形圖案；前年又曾訪港搵埋官恩娜一齊宣傳，做老闆都要親力親為。
前年金融風暴曾經令公司生意大減，但經濟好轉後，佢就繼續大展拳腳，最經典都算係舊年夏天推出埋避孕套，仲一直想同政府合作宣傳安全性行為喎。但可能因為佢花花公子、濫交形象深入民心，人哋睬你至奇。
點都好，SweetYears產品越出越多，例如頭盔、手錶、鞋、同埋BB車……總之乜都有，據講早排推出嘅春夏季服裝系列大賣，佢肯定發過豬頭。
撐意軍入世盃4強
講番近況，36歲嘅佢上個禮拜以元老身份為AC踢表演賽，雖然佢已淡出球壇，但講到今夏世盃依然眉飛色舞，仲預測4強會係英格蘭、西班牙、巴西同意大利。佢話：「意大利近況麻麻，但呢隊波有個傳統，就係球員一走埋就識點樣踢大賽。」即管睇吓佢貼波嘅眼光，叻唔叻得過做生意喇。
韋利小檔案
國籍：意大利
出生日期：12/07/73（36歲）
威水史
‧1次意甲冠軍（96/97）
‧1次意甲神射手（02/03）
‧1次歐洲盃賽冠軍盃冠軍（98/99）
‧1次意盃冠軍（04/05）
