自去年E.T.告別大阪環球影城後，一眾太空生物狂迷失魂落魄，日日望天打卦望UFO有一日會回歸……等到啦！等到啦！E.T.舊居終於有新租客。從銀河系空降的他叫做太陽精靈，一身搶眼黃色勁裝還有一撮迷人的「超人蔭」，令到一班女高中生未玩先尖叫﹗
記者、攝影：吳允冲
鳴謝：日本環球影城、日航天地
360度太空漫遊
太陽精靈（SunFairy）在太陽表面爆炸時產生，有人說造型酷似星爺的7仔，我卻覺得他很似精……靈。以他做主角的新遊戲「夢幻太空之旅（SpaceFantasy）」是個會自轉公轉的室內機動遊戲，全長595米，官方不稱之為過山車因速度比反轉又直衝的過山車慢，時速只有40公里，衝力也細得多，但落坡又勁轉刺激度也不少於3粒星，同行團友J一聽到要轉便率先投降，但愛刺激的我當然第一時間跳上車！進入黑暗空間後迎面而來是萬千星星陣，像真度達90%，頭幾秒還真似在太空飛翔，「嘩—嘩—嘩—」讚嘆之聲不絕，但很快變成「哇—呀—！」慘叫聲，太空船轉彎急墜，同時會據乘客體重等而決定速度，又會繞着故事內容而轉，每次玩都有不同新體驗。太空船出發後先掠過地球，越過星雲及流星陣後便見到巨大的土星，穿過行星陣後最終會衝向太陽，由漆黑一片的太空駛向金光閃閃的太陽，模仿太陽爆炸的一刻令人眼花花。官方指全程歷時4分30秒，我卻覺得只過了1分鐘，唔夠喉囉！玩多次得唔得呀？
星球吞落肚
SunFairy的大眼可愛造型令一眾細路女少女中女大叫kawaii，門前精品店就可將新貨公仔頭套、T恤及棉花糖等掃個夠，連鄰居芝麻街都贈興化身成星形公仔和孖煙囱。對面餐廳亦推出了主題食品「SunFairy之冒險」漢堡扒和「SpaceFantasy」甜品，前者油香豐腴；後者造型花心思，別看藍色星球似好睇唔好食，「地殼」其實是白朱古力做，成個咬開入面是白朱古力慕絲，還隱藏着神秘嘉賓，不過官方話surprise不可公開！至於SunFairy最愛的冬甩亦於SpaceFantasy冬甩店中有售，圓碌碌星球donut有抹茶、士多啤梨、朱古力等8種口味，我們一致認為士多啤梨最鬆軟。
BigBird活動教學
若然SpaceFantasy對你來說已經太過驚心動魄……不如跟老少咸宜的芝麻街一齊fing吓手腳。在街頭的芝麻街BigFaceProject中，BigBird與一班朋友以雙層巴士做舞台，與小朋友一齊唱唱跳跳，「Exercise！Exercise！Exercise！」五歲以下的都跟着舞步郁手郁腳。轉過頭，芝麻街一眾成員又換上一身美式裝束，活動教學美式打招呼文化，原來握手都有三部曲。另一邊廂，又有變臉大師表演國粹，還以為他會變做Snoopy和HelloKitty，事後發覺我確實想得太遠……
卡娃依呢閃燈花車
未到黃昏，路邊已有一家大細擔定凳仔等睇8點的「魔幻星光大巡遊」。時間一到影城瞬即關燈，紅色的Elmo帶領着37架LED閃燈花車出場，由芝麻街、HelloKitty到灰姑娘主題都有，一路看背後不停傳來長而凄厲的「卡娃依呢~」之聲，又是一班女高中生。少女都對blingbling和卡通公仔的免疫力甚低，兩者結合，難怪巡遊自上年開始已成為影城賣點。
日本環球影城（USJ）
地址：大阪市此花區櫻島2丁目1番33號
電話：（81）6-64653000
網址： http://www.usj.co.jp
門票：一日票成人5,800日圓（$498）、
小童3,900日圓（$335）
交通：由JR大阪站搭乘環狀線到西九条站，轉乘櫻島線到環球影城站下車。
SpacefantasyinUSJ
溫馨提示：關西的櫻花將於4月初盛開，去到大阪別錯過賞櫻的機會。
TravelMemo
持BNO或特區護照免簽證可停留3個月，護照有效期最少6個月。日本駐港領事館：25221184
3天大阪套票包日航來回香港大阪機票及兩晚酒店住宿，出發日期4-6月，雙人床房每位$3,620起。日航天地：34291288
100日圓約兌8.59港元（文中價錢已折算港元）
100V，雙腳扁形插座
日本大阪下周天晴，4-12℃
