政府06年推出自訂車牌，等香港人發揮吓創意，最近連長毛梁國雄都度咗個去申請，仲畀佢成功過關，噚日由運輸署公開拍賣。個車牌係「CYUSH0」，睇落好似冇乜嘢，長毛就話代表「好多香港人嘅心聲」。全港最出名嘅「CY」，八方相信係準特首候選人振英哥；至於「USH0」，據講要讀成「USH0」，八方唔好意思講，睇過吓西片嘅讀者都應該明解。
幫小市民出啖氣
噚日拍賣開始咗，長毛都未見人，等咗一輪都未見有人舉高隻手，拍賣官準備倒數三聲收番個牌，點知數到2之時，有位男士舉手，畀佢用5,000蚊投到個牌。過咗20分鐘長毛到場，佢同八方講，自己冇錢同人bid，佢亦唔識投到個牌嗰位男士，仲話可能係振英哥派人嚟投嘅都唔定。
買到個牌嘅市民自稱陳生，做汽車零件生意。佢話早喺運輸署公佈今次拍賣嘅車牌號碼時，已參透車牌嘅深層次意義，至於5,000蚊呢個價，佢話認真抵，當做善事囉。陳生講明唔會拎個牌出去賣，亦唔會自用，反而諗住送朋友。唔知佢有冇個朋友叫振英呢？
對於個車牌過到審批，長毛話只係想幫小市民出啖氣，係一個無傷大雅嘅笑話，佢覺得家陣好多權貴神經太緊張，郁吓就好似古代皇帝咁要誅九族唔講得笑；而運輸署秉持專業精神審批，唔似得警察咁叫佢捉邊個就邊個，認真抵讚。
佢又透露申請緊另一個「D0NALDPK」，但未有回音，佢話要睇吓呢個社會能唔能夠包容市民嘅不滿同有冇幽默感。八方記得，07年都有個「PK」車牌拍賣，仲賣到12.5萬高價，如果今次唔批，當局就真係要解釋吓。公投運動如箭在弦，長毛話佢會喺愚人節左右報名，屆時嗌「起義」、「解放」都冇咁大件事啦。
mailto:[email protected]