上星期講打吡，講到羅傑承先生隻「羅馬」，一時疏忽，寫錯資料，立即畀讀者來郵炮轟，真係鎖你鎖你，謹此致歉。羅馬今季五歲，去季四歲係有跑過打吡嘅，不過輸咗啫。
一位讀者Kong-YanHong（香港人）來電郵，不知是彈是讚，贈左丁山一對聯：
賭波講股盡斂紙張財史史威水
博馬談金俱揚銅板氣通通點石
橫批：史通財氣
左丁山笨笨地，睇到一頭霧水，於是請評馬Ｙ點評一番，評馬Ｙ不假思索，立即動筆修改，改寫如下：
講股賭波盡斂紙張財通通威水
談金博馬俱揚銅板戲陣陣歪風
評馬Ｙ話原對聯不合平仄，改過之後可云通順，請「香港人」讀者注意吓。
講到馬，因有大事，唔講唔得，星期四早上得知「蓮華生輝」於三月十七日夜登機往日本名古屋中京馬場參加高松宮盃之時，突現腹絞痛，好彩還未上機，立即有獸醫照顧，但相信要一段好長時間先至復元，但隻馬已經年紀唔細，今次傷咗，類似碧咸斷腳筋，前途難以預料。唉吔，前有「精英大師」，現有「蓮華生輝」，都係短途馬王，竟然同樣因為傷病而失去光芒，令馬迷痛惜之至。因「蓮華生輝」唔去日本，馬會大失預算，原本三月二十七日係賽馬日，為咗要直播，馬會要向行政會議申請修改賽馬日期，延遲至三月二十八日，大隊人馬安排好晒去日本，點知竟然辛苦努力一場空。你知啦，三月二十八日就係七人欖球賽決賽日，原本係唔想撞期嘅，好多馬圈外籍人士其實好想在星期六跑馬，星期日就到大球場高興一番嘅，家冇咗「蓮華生輝」出賽，點算好？人算不如天算，此之謂也！一位日本馬圈人士亦大嘆可惜，佢對左丁山講，「蓮華生輝」幾乎可以穩勝高松宮盃，日本馬迷睇唔到「蓮華生輝」表演，是一場遺憾。講番今日賽馬，第九場係中大校友會聯合盃，有大批中大校友入場，賽前論戰，1號「正歡騰」，5號「馬主精英」，11號「同心同德」，8號「印度光輝」四匹有得爭。