煲呔噚日去廣播道商台接受訪問，特首駕臨，商台勞師動眾，以最高規格迎接；向來作風低調、平日罕有公開露面嘅老闆何驥一早就返到，揸fit人俞琤亦晨早出現恭候煲呔，更犀利係喺地下大門口鋪上長長紅地毯直入大堂，連部老爺都鋪埋，唔會整花煲呔對靚鞋。
何驥俞琤企門口接客
八方現場所見，張地毯新簇簇，連「浸」透明保護膠紙都未搣，等到煲呔將近抵達時，工作人員先開封，閒雜人等不得踏上紅地毯。
煲呔準時到達，何驥、俞琤同其他商台高層企在大門口迎接，陪佢一齊入去直播室，招呼貴賓絕不怠慢。
一小時訪問結束，何老闆同俞琤又親自送客，兩人傍住煲呔離開，送到大門口，睇住煲呔上車，連連揮手講拜拜。煲呔一上車，工人就捲起張紅地毯收埋。
有商台中人稱，記憶中好似未見過咁大陣仗迎接受訪嘉賓。