搞政改，被罵當奴；搞民生，被批不該，多年來狂插與劣評，練就一位有毅力、有技巧的擦鞋特首。煲呔噚日公開宣示擦鞋秘笈，要用陰力，要有耐性，集中精神擦呀擦，就可以擦走政治壓力。
「忍耐去做先會靚」
「孤獨的推銷員」噚日以擦鞋仔新形象示眾，接受商台訪問時細說擦鞋技巧，更笑言要搵戲院里專業擦鞋匠切磋，表現招積，「你要好有耐性o架，你擦鞋唔係話就咁擦對鞋，你要磨到佢靚，好似鏡仔咁靚嘅時候，真係要好大耐性；唔可以太大力，要細細力，又要點少少鞋油，逐對逐對、逐寸逐寸咁磨，需要時間，需要毅力，要集中精神，唔集中精神嘅時候，會磨到變豆皮婆咁，越磨越醜樣o架，你要有忍耐力咁去做，先會靚o架。」
特首擦鞋功夫唔簡單，「平時擦，我唔會咁擦，但我好鍾意一到周末，就坐低拎對鞋出來，攞我最鍾意嘅鞋油，慢慢慢慢咁磨呀磨，磨番靚對鞋，好似差人個對鞋頭一樣，係立立令嘅。」噚日出版嘅新書《同一屋簷下的天使》中，煲呔更仔細分享擦鞋減壓心得，形容磨鞋係最佳減壓活動﹕「這15分鐘可以忘卻政治、豬流感……所有的問題。我只專注於磨好眼前的一雙皮鞋，真的很relaxing。」
「爸爸是警察教我如何磨」
此擦鞋絕活原來係父親曾雲真傳，「我爸爸是警察，很着重要磨好一雙皮鞋，他總是將皮鞋磨得漂漂亮亮，大約10歲時便教我如何磨靚對鞋，到現在其中一件能令我輕鬆的事，就是去磨靚對鞋。」他對擦鞋很講究，「首先要有好的工具，鞋刷要用豬鬃毛，黑鞋刷和黃鞋刷要分清楚不要搞亂，鞋油也要準備兩罐。抹布必須選用舊內衣的布，棉質的衣服穿久了就沒有毛頭，衫的前後兩面剛好可做兩塊布。」
八方翻查過去半年資料，發現每當有大鑊嘢或者要見領導人，煲呔對鞋必定光可鑑人，可見佢真係藉擦鞋減壓，所言非虛。舊年10月施政報告建議派慳電膽券，爆出疑似益親家醜聞，煲呔民望插水，當時佢對鞋擦到立立令；到年底上京見胡、溫，被領導人照肺要解決深層次矛盾，煲呔對鞋令到反光。
擦鞋咁多好處，港府應集中火力打造香港為shoeshinecity，打造亞太區擦鞋平台，群刷創新天！
擦鞋匠：佢係唔係冇嘢做
未切磋，招積嘅業餘擦鞋仔已跟專業擦鞋匠擦出火花！特首笑說搵日同戲院里擦鞋匠切磋，專業擦鞋匠話唔好搵嘢嚟玩！明哥喺中環戲院里擦鞋十幾年，得知特首以擦鞋減壓，反應係：「係咪得閒到冇嘢做？啲時間多到要用嚟擦鞋？」明哥越講越火：「特首可以做好多嘢，實際啲，每晚對住塊鏡十分鐘，諗吓自己做嘅嘢啱唔啱，好好反省吓。」
「我擦鞋係為咗搵食」
對事不對人，明哥都同意擦鞋可以減壓：「擦鞋可以訓練耐性，當你畀心機做一樣嘢，集中精神去做，係可以減壓。」明哥對煲呔擦鞋方程式都無異議，相信煲呔係擦得之人，但技巧一定贏唔到佢囉，除非可以擦到照牙罅先可比擬。同區另一擦鞋匠「阿B」反應更大：「減壓？我擦鞋係為咗搵食，唔係減壓，曾蔭權講嘢係廢話。」
警隊嘅「擦鞋文化」逐漸消失
煲呔幼受庭訓，練得一手擦鞋絕技，有退休警務人員稱，殖民地年代所有新入職警員受訓時，首要學擦鞋，「對鞋要擦得立立令，以前係軍靴，啲皮又凹凸不平，好難擦。」如何將鞋擦得亮麗，老差骨話秘訣係先落好多鞋油落對鞋度，然後搵火微微燙熱對鞋，形成保護膜，再用棉布沾少少水去擦，咁先容易擦到立立令。
隨着警隊制服裝備更新及時代變遷，警隊擦鞋文化失傳，警務督察協會主席廖潔明話：「家對鞋唔使擦得立立令，只要乾淨整潔就得，何況家每間警署都有擦鞋機代勞，可以講擦鞋文化喺警隊正逐步消失。」
學者分析：佢要令自己平靜
位高權重嘅特首，原來以擦鞋減壓，仲喺磨鞋裏找到同已逝世父親最後一絲聯繫：「我空閒時就磨鞋，一磨鞋就想起爸爸。」浸大社會工作系助理教授陳德茂話，相信煲呔係透過重溫兒時歲月，轉移日常事務中嘅困擾：「擦鞋減壓呢個概念，背後意義可能係靠擦鞋連繫番過往嘅父子情，懷念童年生活，令自己平靜落嚟。」中大政治與行政學系高級導師蔡子強就話，煲呔忽然發表擦鞋減壓論，相信無甚政治盤算：「明知一講出嚟，一定會俾人惡搞。」佢指煲呔冇乜嗜好先至選擇一種機械式動作嚟減壓。曾任曾蔭權家廚嘅于燕平，就話未見過曾蔭權親自擦鞋：「佢次次都係搵工人幫佢擦鞋。」
擦靚鞋唔平 LV套裝6100蚊
工欲善其事，擦靚鞋就要落足本，八方問過多間皮鞋皮具名店，LV皮革護理兼擦鞋套裝賣6,100蚊，包大小五個豬毛刷連兩樽鞋膏，最矜貴係個LV鞋袋；Berluti擦鞋套裝4,780蚊，有一個軟毛刷同兩樽鞋膏；J.M.Weston有套boxset賣3,700蚊，包兩大兩細鞋刷及絨布，鞋膏另買。
平民化啲可選擇Prada，擦鞋套裝只售2,500蚊，抵買，可惜冇貨；a.testoni個kit有大細兩個鞋刷，索價2,280蚊，Dunhill兩個刷連兩瓶鞋膏套裝僅780蚊，大件夾抵食，唔知煲呔心水鞋油係邊一種呢？