廣南集團（1203）09年度肯定有靚仔業績，呢期已經三線滙合，買定等爆邊。廣南今年頭已經發盈喜，話09年度業績大幅增長，唔好計多，純利係咁意翻半番到1.5億銀，預期PE跌到得9倍單位數。要咁睇，廣南主打馬口鐵產銷，產品又係副食品必須器皿，單係龐大嘅內銷因素，已經長做長有，2010年度純利只係再溫和增長20%，預期PE進一步跌到得番7.6倍，紅色股仔當中，呢個PE好吸引。再講，廣南最新PB喺1倍樓下，紅色股份中，買少見少，講PB，廣南抵搞。
廣南經過近3個月打橫行，日線圖幾條重要平均線，已經扭埋一齊，嚟緊星期五又派成績表，買定炒業績，博爆向上，以2010年度預期PE10倍做目標，廣南要見兩蚊，現價1.52元潛在回報率32%。
中國農產聞到鑊氣
中國農產品交易（149）主打祖國農產品批發市場業務，最新NAV0.146元，現價0.114元仲有折讓23.5%。市場裏邊嘅農業概念股，經上年以嚟，以阿爺扶農政策導航，炒完再炒，有折讓嘅唔多，中國農產係其中一隻。集團上星期五成交股數上兩億股，聞到有鑊氣，趁勢快炒，短打博升20%到0.137元，中國農產仲未上到NAV水位。
錢雋