最近夜歸返家，第一件事唔係沐浴更衣，而係追睇翻播N咁多次嘅二奶台經典劇《滿清十三皇朝》，近日劇情已講到三藩之亂。每當老婆話我老餅，我就回應如果當年唔揀讀社會學，就一定讀歷史。歷史話我知，強隊冇可能連衰幾場，國米近6場聯賽僅1勝，除非摩連奴願將個錦標讓畀AC，否則戰意戰力兼備，今可破巴勒莫主場不敗身。
睇完國米點喺歐聯技術擊倒車仔，令我對呢隊波刮目相看，平時隊波勒住勒住，原來去馬時可以踢到咁嘅水平，當專搞破壞嘅蒙達利、巴洛迪利今場都不在陣，應該冇變數。
人生有幾多個10年？小弟剛喺《蘋果》工作10年，記得第一次貼嗰場就係國米，衰咗，希望歷史唔會重演。
藍鑽石
讓球：國際米蘭（上）
心得：唔信儍豹全季主場都唔輸
近5場往績：WWWWW