人民幣前景大好，精明師奶都會吼住時機入啲貨，身兼東區區議員嘅社民連成員曾健成阿牛有個醒目太太，牛嫂日前去新蒲崗大新銀行想開人仔戶口，點知受到諸多阻撓，呆等兩個幾鐘頭後，有職員竟然問，佢老公係咪政界人士曾健成？
牛嫂開戶口，唔使撻老公個朵，點解職員有此一問呢？牛嫂質問職員點解會知道佢老公身份，即刻要求對方解釋，係咪有咁嘅身份就唔開得戶口吖？職員喺連番追問下可能膽怯，冇再留難，快快辦妥手續為牛嫂開戶口。阿牛得悉後好氣憤，質疑大新有政界黑名單；八方向大新查詢點解唔歡迎牛嫂開戶，至截稿前未有回應，難道純粹誤會一場？