美國前國務卿賴斯噚日去中大演講，題目為「未來的亞洲」，吸引過千人出席，律政司司長黃仁龍、中大前校長李國章都係座上客。提到美國前景，最令賴斯擔心嘅唔係經濟，而係教育制度。佢話曾經問一個細路9乘5等於幾多，細路非但答錯唔肯改，仲要牙尖嘴利駁嘴：「冇一個答案係錯！」激到賴斯紮紮跳。席間，賴斯勸勉學生要對自己有要求，凡事唔好輕易放棄，「即使自己唔擅長嘅事，都要努力做好。」
演講後，中大學生會代表突然高舉貼有「Shame（羞恥）」字眼嘅紙牌抗議賴斯，示威嘅秦同學指賴斯演講內容避重就輕，避談美國出兵伊拉克同阿富汗嘅事，美國只顧自己利益，對未來的亞洲根本毫無承擔。