「蘋果動新聞」推出後有唔少議論，最新一期中大《大學線》探討動新聞問題，訪問301名大學生，當中41%睇過動新聞，其中41%話動新聞係多一個途徑了解新聞，53%覺得富娛樂性，36%話因免費至睇，不過都有30%話因為唔使睇文字。
以另一種手法展現
有29%受訪者認為睇動新聞增加佢哋想了解社會時事意欲，同表示不會增加意欲嘅比率一樣。另一個關注點，只得18.5%認為動新聞內容可信，比表示唔可信嘅人少近一半（31.5%），其他話可信性一般。
《蘋果日報》執行總編輯蕭煒春同《大學線》講，動新聞內容係依據記者採訪所得資料，以另一種手法展現可能出現嘅概括情況，唔係要完全模擬事件。佢又話，一般觀眾可能已睇過電視新聞，所以動新聞要跳出四平八穩框框，以增加吸引力。
95%有睇過動新聞嘅大學生話，如果要畀錢先有得睇，就唔會睇。大部份人話係喺蘋果網或YouTube睇動新聞，只有3%用手機壹斑碼睇。