南非世盃決賽周仲有唔夠3個月就開波，我即時諗起嘅唔係美斯或者C朗，反而係日本長壽漫畫《足球小將》，仲記得喺4年前嘅德國世盃決賽周，追緊套《Golden-23》㖭。講真，《足球小將》個故事真係幾爛，而且越畫越誇張，兼且仲成日爛尾，但無計啦，鬼叫我由細睇到大，所以對佢有一份情意結。係人都知《足球小將》由戴志偉（即大空翼）嚟孭飛，但我最鍾意嘅角色，卻係由進攻中場改打防中場嘅松山光。
中村俊輔被認為係真人版嘅戴志偉，佢今年由西班牙愛斯賓奴回流返日本效力母會橫濱水手；而水手條中場線由佢助陣，組織進攻能力明顯強咗好多，今日喺主場對冇咗幾個主力嘅川崎前鋒，信佢哋可以贏多一場，平手必捧。
青蛙仔
讓球：橫濱水手（平）
心得：中村令水手升晒呢
近5場往績：LWLWW