保育風席捲全城，忽然有得留低嘅永利街日日人頭湧湧，尤其係班龍友，幾乎不分日夜全天候影相，噚日來咗個稀客，應該係舊街坊。中西區關注組成員羅雅寧噚日中午食完晏時間，經城皇街上去永利街，赫然見到特首煲呔沿城皇街落樓梯，只有兩個保鑣在旁，似係微服出巡。
據講煲呔當時神態輕鬆自若，行到永利街口時停低，若有所思，可能諗起鞋有半邊難，鞋有半邊佳嘅歲月而出神，卻過街不入。佢噚日冇帶相機，應該唔係想湊熱鬧影相，羅雅寧同煲呔打招呼，問佢係咪公佈好消息，煲呔只係點頭微笑，冇講嘢就離開。
禮賓府請管事
噚日下晝有高官喺荷李活道前警察宿舍開記招，邀請各界將宿舍改做創意中心，該處係煲呔童年舊居，唔知佢有冇順路去睇吓。特首辦發言人話特首好關注中環保育，係舊年施政報告重點，今日行經城皇街，已睇到永利街情況。
煲呔噚日冇同老婆一齊行街，曾太朝早去咗維園花展，去到印尼領事館個攤位，獲贈蠟染頸巾同木雕面具，前者係送畀VIP禮物，木雕則係印尼名產，掛上牆除咗係裝飾，據講仲有辟邪作用。八方唔知曾太會唔會掛起個面具擋煞，事關禮賓府有精心風水佈局，亂咁擺放法器有可能相冲。
車公上年批示特區內有家鬼，煲呔住嘅禮賓府果然就鬧出醜聞，深得煲呔信任嘅家務員，竟然趁煲呔外訪之際，呼朋喚友帶埋隻狗玩轉禮賓府，查明有人犯錯後，涉事家臣被炒魷魚收場。特首辦噚日刊登招聘廣告，請月薪20,835元管事同月薪14,745元初級管事，可能炒人後要請番人做嘢。
禮賓府管事入職要求九年相關經驗，中、英文流利，最好有餐酒同到會服務知識，職責包括提供私人起居服務，招呼來賓同打點日常餐飲；初級管事最少要有三年相關工作經驗，職責同管事差唔多，但要做埋針黹同修補衣物，兩個職位都係兩年合約制，福利唔包括同朋友在禮賓府開BBQ派對。
mailto:[email protected]