今個月新Game勁出！《GOWIII》後再嚟《人中之龍4》，之後仲有《北斗無雙》，我個銀包絕對有被初始化危機！講番《人4》，老實！佢可以排到最後先玩，因為今集除咗有4個主角故事線之外，仲有超過10種小遊戲，淨係掛住吃喝玩樂，我覺得太頹廢囉！
文：阿洛
神室町BigFour
全系列累計銷量超過320萬嘅《人中之龍》系列最新作，今集繼續以虛構嘅神室町為舞台（極似現實中新宿歌舞伎町），龍蛇混雜，有得食有得玩，仲有大把靚女喺度蒲。
今集主要故事線再被強化，除咗大家都識嘅「傳說之龍」退役黑道大哥桐生一馬外，仲有錢莊老闆秋山駿，同埋殺害過18名黑道中人，坐牢坐咗25年嘅冴島大河，同有個朵叫做「神室町蝨子」嘅刑警谷村正義；4個主角故事互相交纏，拼湊出包括友情愛情嘅熱血男子漢故事；可惜無中文版，而且可以慳番唔使等，因為就算係英文版，都只不過係啱啱出咗第三集，呢個時差，我接受唔到！
4種開拖生活
黑幫故事開拖難免，4名主角嘅戰鬥風格都唔同，桐生一馬係能力最為平均嘅；而秋山駿就腳上功夫最犀利；冴島大河就係大隻力量型；最後谷村刑警就係具速度及關節技嘅技巧型。而除咗能力有別，喺神室町嘅地位都會影響佢哋嘅開拖生活，好似秋山駿就因為同居民關係良好，所以戰鬥時會有人幫拖；逃獄嘅冴島大河就要同追捕中嘅警察展開追逐；而刑警谷村，就有對講機畀貼士，可以知道神室町發生緊嘅事。而遊戲中各主角都可以邊打邊升呢，能力同鬥氣會增加之外，仲有不同嘅「技能魂」，包括攻擊、熱血動作、迴避同增加熱血計等技能，都係要你慢慢強化。
小遊戲唔會少
小遊戲甚至有趣過主線劇情，極有妹仔大過主人婆嘅感覺，就係由上集《人中之龍》開始嘅風格。今集繼續加碼，暫時公佈嘅玩樂設施包括有浸溫泉、溫泉乒乓球、高爾夫球、機舖、「柏青哥」彈珠機、棒球練習、保齡、日本將棋、釣魚、麻雀、賭場等等，而且樣樣都唔可以睇小，製作嘅認真程度都比主線遊戲有過之而無不及，所以實在係好易令人玩物喪志，沉迷女色、賭博、玩樂之中，荒廢屋企打到一半嘅《GOWIII》同埋啱啱新買嘅《北斗無雙》，何苦呢？
Profile《人中之龍4》
主機：PS3
類型：冒險
人數：1人
製作廠商：SEGA