早排公民黨立法會議員湯家驊寫咗封香港家書，話今次泛民同阿爺傾唔掂政改，泛民支持者就會加入社民連，再加埋之前湯狀又對傳媒話，五區公投影響泛民同阿爺溝通，結果先後俾毓民同陶君行鬧佢「賣友求辱」。
噚日泛民開飯盒會，湯狀見到社民連副主席吳文遠同秘書長季詩傑，終於忍唔住向對方開炮，拍晒枱鬧佢哋兩個，但季詩傑亦唔係省油燈，即場同湯狀片過。
事後湯狀同八方講，佢自己當時真係動咗氣，全因有網民聽完毓民鬧佢，對佢喊打喊殺之餘，更鬧埋佢屋企人，正所謂禍不及妻兒，湯狀自然火滾，但佢明白要以大局為重，希望事件到此為止，自己亦唔想再鬧來鬧去，影響泛民公眾形象。