雖然蔡卓妍（阿Sa）同鄭中基（Ronald）多年嚟冇正式承認過拍拖，不過佢哋嘅戀情可算係公開秘密，仲不時隔空打情罵俏。早幾日先有消息話阿Sa同Ronald06年喺洛杉磯秘密結婚，點知第二日佢哋避談結婚傳聞之餘仲忽然自爆分咗手，事情可謂峯迴路轉。
前日阿Sa同陳偉霆及導演王晶喺內地接受網站訪問宣傳新戲《美麗密令》，啱啱公開分手，焦點當然仲喺阿Sa度。
「以後不要再煩我」
阿Sa再被問到分手一事，佢就唔耐煩咁話：「最近的新聞越來越煩我覺得好煩，大家都知道我不喜歡講與工作無關的事情，這些都是我跟別人私下的事情，昨天我已經講，希望以後不要再煩我！」講到分手原因，阿Sa梗係唔講，但佢都有感而發話覺得喺圈中要保持一段關係絕對係唔容易。
此外，何韻詩前晚喺中環現身時裝品牌活動就阿Sa同Ronald分手一事爆料：「知道佢哋分咗一陣，私底下同阿Sa熟，我哋表面九唔搭八，不過平時有傾吓感情事。」阿詩話阿Sa大個女唔使安慰，唔使擔心。但阿詩口口聲話同阿Sa係friend，但又唔知佢哋有冇結婚。
講到Ronald花唔花弗，阿詩笑笑口話：「呢個世代好多誘惑，無論係男同女都好多渠道，最緊要係兩個人夾唔夾。」
鄭中基唱歌谷新戲
至於Ronald日前去咗廣州宣傳《越光寶盒》，現場有fans要佢即場唱歌，Ronald眼見fans咁熱情都即場唱幾首，搞到宣傳活動變成歌友會，而新戲內地首映當日票房就有900萬人民幣，成績相當理想。